Guía antiestafa: contrata sen sustos

Na inmensa maioría dos casos, contratar un profesional vai ben. Pero as estafas en reformas e reparacións existen, e case todas seguen os mesmos patróns. Con estas regras básicas redúcense a case cero.

As 7 regras de ouro

1. Pide sempre orzamento por escrito antes de empezar, aínda que sexa por WhatsApp. Debe indicar traballos, materiais, prazo e prezo total con IVE.
2. Non pagues nunca todo por adiantado. O normal é pagar ao rematar, ou por fases nunha obra grande. Desconfía de quen pide cartos "para materiais" antes de empezar e máis do 20-30%.
3. Pide factura. Sen factura non hai garantía legal nin reclamación posible. Un profesional serio non pon problemas.
4. Compara 2 ou 3 orzamentos en traballos grandes. Un prezo moi por debaixo do resto adoita esconder sorpresas.
5. Comproba referencias: valoracións aquí en VigoManitas, traballos anteriores, anos de experiencia. O selo Verificado indica que acreditou a súa actividade ante nós.
6. Desconfía das présas. "Só hoxe a este prezo" ou presión para asinar no momento son sinais clásicos de timo.
7. Garda todo: orzamento, mensaxes, xustificantes de pagamento e fotos do antes e do despois.

Sinais de alarma

• Non dá nome completo, nin enderezo fiscal, nin quere dar factura.
• Só acepta efectivo e pide unha porcentaxe alta por adiantado.
• Aparece na porta sen que o chamaras ("estamos a facer obra na zona e vimos o seu tellado…").
• Non ten teléfono fixo de referencia nin se lle pode localizar despois.

Se algo sae mal

Reclama primeiro por escrito ao profesional. Se non hai resposta, podes acudir á Oficina Municipal de Información ao Consumidor (OMIC) de Vigo (Praza do Rei, teléfono 010) ou ao Instituto Galego de Consumo. Con factura, tes dous anos de garantía nas reparacións.

Se un perfil desta web che parece fraudulento, escríbenos a unmedia [arroba] me.com e revisarémolo.